Ҳамро БОНУ – 1971 йилда туғилган. Тошкент давлат университетини (ҳозирги
ЎзМУ) тамомлаган. “Ҳаққа етказ”, “Арбағишнинг лолалари”, “Маҳфий учлик ёхуд
сирлар салтанатига саёҳат” номли китоблари нашр этилган.
Илтижо
Ёрим, дилда борингни баён этсанг бўлмасми
Гул рухсорингни менга аён этсанг бўлмасми?..
Дилга қуриб қасрингни нигоҳим ойна этиб,
Ишққа ташна қалбимни макон этсанг бўлмасми?..
Рухсорингни бир бора кўрмоқ истайди кўнгил.
Ёлғиз сенинг ишқингда куймоқ истайди кўнгил.
Сендан не келса майли, шодликми, қайғу-ғамми
Барин қўймай сипқориб тўймоқ истайди кўнгил.
Хуш насимдай келиб ёр, дилдан қайғуни қувиб,
Менинг муштипар кўнглим осмон этсанг бўлмасми?..
Чорлов
Бир суҳбат қурайлик, азизлар
Ҳадемай, кўнгилдан йироқлаб
Кетади, шукуҳли бу дамлар.
Бир кун келиб ҳаммамизни ҳам
Унутиб юборар одамлар.
Изимизни босади қорлар,
Гул узатмай қўяр баҳорлар.
Бир хўрсиниб салқин саҳарлар,
Ялпизли қирғоққа бош қўйиб
Мунғайиб оқади анҳорлар.