Муҳаммадсоли УЛУҒБЕК – 1955 йилда туғилган. Тошкент давлат университетининг
(ҳозирги ЎзМУ) журналистика факультетини тамомлаган. Ижодкорнинг “Юракни
тушунинг”, “Дунёнинг кўзлари”, “Райҳон иси”, “Тонгга етсак…”, “Ҳаёт фалсафаси”,
“Туюқдаги туйғулар”, “Имомота қиссалари” каби китоблари чоп этилган.
***
Ёмғир ва мен – бу кеча дайди
Суҳбатдошмиз, кўча кезамиз.
Ёмғир шивирлаб ҳеч тўймайди,
Балки тонг отгунча кезамиз.
Бўйсунаман ёмғир измига,
Менга ҳамдард керакдир дилкаш.
Қулоқ тутсам ёмғир сўзига,
Аригандай бўлар дилдан ғаш.
Бир кўчадан ўтамиз илҳақ,
Кўз тикамиз бир деразага.
Бекасидек дераза бефарқ,
Парво қилмас мендек задага.
Ёмғир шивирлашин қўймайди:
“Ўзни дадил тутгин, ҳой йигит!
Менинг билан дардлашиб, дайдиб,
Шаҳар кезсанг, ғам бўлар унут!”
Балки қизга алла айтади
Жамоли-ю ғурури бу кез.
Кўчасида неча қайтадан,
Ёмғир ва мен қолдирамиз из…
Ёмғир ва мен бу кеча дайди
Суҳбатдошмиз, кўча кезамиз…