Барно ҚОЗОҚОВА – 1983 йилда туғилган. Урганч инновация университетининг ўзбек
филологияси йўналиши талабаси. Ижодкорнинг “Кўзларимнинг қароғида сен” номли
китоби нашр этилган.
Соғинч
Денгизлар ҳайқирар соғинчдан бир кун
Ҳаддидан ошади шамол бешафқат.
Дийдоринг келади ўзинг-да тутқун,
Тополмайди мени, топмайди фақат.
Субҳидам юрагим ёмғирдай ёғса,
Заминнинг бағрига сингиса оҳим,
Дардларим чақмоқнинг нуридан куйса,
Қалбимдай тўкилиб ёғса гуноҳим.
Унутмоқ истадим ўзимни бунда
Бир зум ёмғирларга ошно бўлсайдим.
Сени эслатгувчи хотираларни
Ўчириб ёғсайдим, ювиб ёғсайдим.