Гўзал ШАРИПОВА – 2001 йилда туғилган. Навоий давлат педагогика институтининг
хорижий тиллар факультетини тамомлаган. Шеърлари республика матбуотида нашр этилган.
* * *
Кўнглингиз
Кўксингиз
Кўк денгиз…
Мусаффо бағридир осмоннинг.
Кун ила тун ҳамон ёш – эгиз
Манзиллаб излайди ошёнин.
Йўлакнинг тўқнашмоқ хислати
Тақдирнинг жумбоқли эшиги.
Юраклар: тўқнашмоқ қисмати
Жажжи бир юракнинг бешиги.
Кетасиз сафарни соғиниб…
Йўл қараб қолади Умрингиз.
Энтиккан кўнгилнинг соҳили
Кўнглингиз…
Кўксингиз
Кўк денгиз…
* * *
Нуқта – тамом дегани?
Асло!
Давоми бор ҳар бир лаҳзанинг.
Ҳар гал нуқта қўяди асо
Ожизликдан – сағир бахт сари.
Ёмғир янглиғ ёғар кўп нуқта
Чексизликнинг четлари қадар.
Кимсасизлик туяр бир муддат
Кимсалардан туғилган кадар…
* * *
Осимон,
Хилват тут ўзингни;
Этмагин намойиш юзингни.
Биёбон,
Чанг босган сийратинг,
Бир қоқсанг, демоқдир ниятим…
Заъфарон
Хазонлар – эртакчи
Чўнтакни эслатар, ул(!) – тақчил…
Хиёбон
Бикрнинг киприги;
Лаҳзалик умрнинг кўприги.
Бепоён
Гарчи бахт этаги,
Эҳтимол, тонг отмас эртага…
* * *
Назар солинг нигоҳларимга,
Қулоқ солинг созим – юракка.
Шодлик учун яралсин имкон,
Руҳ уйғонсин самандек саркаш.
Узайганда манзилсиз йўллар
Узилмасин ҳаёт киприги.
Дарахтларнинг ёқаси гуллаб,
Бармоғида тўла барг – нигин…
Эрта оқар осмон кўзидан,
Кўзи ёрар майин ҳавонинг.
Узоқлашманг ўнгимдан бир дам,
Туш кўрмасин қалбим хавотир…
* * *
Чойдек сузилмоқда заррин хазонлар
Пиёладек бутун поёнот сари.
Сабо кўз очади саҳар-азонлаб,
Тараб мажнунтолнинг жунун сочларин.
Пештоқда кўринар кўк сепкиллари,
Зебо юзли сулув – ой аросатда.
Бир-биридан тиниқ порлаган сари
Уйғотиб олади офтобни ғафлат.
Парвоз
Учмоқ учун юксакда қушдек
энди фақат осмон керакдир…
Ферузшоҳ
Осмон осмонликдан ўзни йўқотган,
Манзил лаҳза сайин янглишар издан.
Вақт – одил ва унинг йўли йўқ ортга,
Ижозат нимадир?
Бегона биздан.
Камолот – истиқлол узра остона,
Кенг ҳаво соҳили туташар ерга.
Йўқликлар сиртида борлиқ – кошона,
Одам – олам узра кўк сари тиргак.
Асрлар яралмиш йилдан илгари,
Бир ками тўлиқсиз дунё тўқ, лекин,
Жуда ҳам, жуда ҳам алам қилгани
Қанот топилганда осмон йўқлиги.
«Шарқ юлдузи» журнали 2025-йил 3-сон