
Аслиддин МУСТАФО – 1980 йилда туғилган. Самарқанд давлат университетининг
ўзбек филологияси факультетини тамомлаган. “Тегирмон” ва “Тўкилиш” номли
китоблари нашр этилган.
* * *
Кўзингни юм, дединг,
Юмдим кўзимни
Ғаддору, ғайиру нокасни кўрсам.
Кўзингни юм, дединг,
Юмдим кўзимни.
Ўзин осмон билган ҳар касни кўрсам.
Кўзингни юм, дединг,
Юмдим кўзимни.
Кўнгил кўз ўрнида кўрди очунни,
Оқни оқ, қорани қорадек кўрди.
Икки ён ажратди ёлғону чинни
Ва кўзни очмоқни истамай қолдим.
Очсам ваҳшат ичра жоним қоврилар.
Энди очиқ кўзни юмсам гуноҳдир,
Энди кўзим юмсам умрим соврилар.
* * *
Оққуврайнинг бўйлари қани,
Қўзигулнинг болин ичган кун?
Кенг кўйлагим кўксини очиб,
Елкан ясаб, шамол кечган кун?
Қайда қолди жавзода пишган
Болаликни чўмилтирган сув?
Ҳатто бошдан рўмолин ечмай
Сувга ўзин ташлаган сулув?
Оёқларга олов улашган,
Йўллар қани – кўпчиган тупроқ?
Қумга тўлган чумоли ини,
Ковраклардан ясалган учоқ?..
…Афсусларга кўмилди кўксим,
Чумолилар қасдин оляпти.
Оёғимга туташган олов,
Бугун дилга қутқу соляпти.
Учоқларим синган қаноти,
Қумлоқларда юрмам беҳадик.
Сувпаримнинг бугун рўмолин
Кимга элтиб бердинг, болалик?
* * *
Қишлоққа борсам…
Бир интиқлик исканжа этар
Худди онам кутиб оладигандай.
Эшик очилмайди… эски… чинордан,
Юз йиллик нақшин
Ва юзлаб дарзин
Юрагимга соладигандай
Бир қутқу боримдан ташлар айириб.
Ичкари кираман…
Кўҳна сандалда
Отам ўтиради ғам билан.
Дардин олай десам, истамас.– Энди бору йўғим шу, болам, – дейди
Сандалда лахча чўғ – хотира…
Жунжукишдан асрар жисмини.
Бу ҳолда дунёни унутиб қўйса ҳам,
Унутмас онамнинг исмини…