Рухсора ЛУҚМОНОВА – 2001 йилда туғилган. Шаҳрисабз давлат педагогика
институти талабаси. Шеърлари республика матбуотида эълон қилинган.
Ўзин дунёлардан яшириб шошган,
Ғунчанинг бағрида ўралган дилсан.
Фақат хаёлимда тирилиб туриб,
Хаёллар ичида ухлаган гулсан.
Сен менга тегишли илоҳий бир туш,
Қаро тун бағрини тилкалаган нур.
Қанотида кўкни кўтарган бир қуш,
Қароғида ерни тутиб турган ҳур.
Сен менинг ҳаммадан яширган сирим,
Юрак титроғидан туғилган бир байт.
Жимгина пойингга тўкилар сўзим,
Соям кўзларингга тушиб ўтган пайт.
Сен уқиб ол кўздан, сўзларимданмас,
Юрак дарвозасин очмоқлик хато.
Сен мангу сиримсан, ҳеч ким билмаган,
“Сир ошкор этганни севмайди Худо…”1
1 Зебо Мирзо сатри.