Барака ХАЙРУЛЛОҲ – 1989 йилда туғилган. Ўзбекистон Миллий университетининг
филология факультетини тамомлаган. Ижодкорнинг “Сени кўрганимда”, “Дунё”,
“Чанг” номли китоблари нашр этилган.
Ирода
Кузги япроқларни совурган шамол,
Мажолсиз руҳимга исёнлар пуркар.
Нетай, кўрсатмадинг рафтори жамол,
Шафқатсиз ўйлардан ҳисларим ҳуркар.
Олисдан очилган майда гулларни,
Ҳосил бўлолмаган булутлар билмас.
Заминга ташланган улкан ғулларни,
Онгсиз жараёнлар тафаккур қилмас.
Кечаги китобни ташладим уйга,
Ўргатиш мумкинмас қандай йиғлашни.
Сўзлар тополмадим чалинган куйга,
Уддалай олмадим ўзни тиғлашни.
Таъсир
Қишдан чиқолмади шўрлик Зебижон,
Баҳоргача етиб бормади умри.
Тасодифлар билан талашади жон,
Менинг ичимдаги нолакор қумри.
Қишдан чиқолмади шўрлик Зебижон,
Ҳаёти қоришди совуқ кунларга.
Такаббур лаҳзалар сочаверди дон,
Ўхшаб кетаёзди қорли тунларга.
Қишдан чиқолмади шўрлик Зебижон,
Йиғган сепларини нетади тақдир.
Ожиз қолавердик, беролмадик ён,
Қаламнинг эгаси барибир Ҳақдир.