Мавлуда РЎЗИЕВА – 1967 йилда туғилган. Қарши нодавлат педагогика институтини
тамомлаган. “Бир севги қисмати”, “Онамни қайтаринг юлдузлар”, “Сўздан тониб
бўлмас”, “Қўш ирмоқлар”, “Тушдаги учрашув”, “Кўзларимга суртгум тупроқларингни”
каби китоблари нашр этилган.
Дурдонаман
Кечалар кўкка боқиб васлингни эслаб ёнаман,
Собиту сайёралар кулгусига мастонаман.
Соғиниб, ҳажринг ила юз ўртаниб, юз дард чекиб,
Сайдини ахтарган ул сайёд каби сайронаман.
Ташласанг бир дам нигоҳ, сеҳрига мен сайду асир,
Кўз қароғинг ичра жой олган ўзим пинҳонаман.
Боқмасанг, кетсанг қочиб, тоғлардаги жайрон киби,
Ахтариб жайронини, куйган дили вайронаман.
Кўлдаги оққуш мисол жуфт-жуфт бўлиб сузсак агар,
Шодлигимдан энтикиб, қайғуларга бегонаман.
Менки Мавлуда, сенинг ишқинг билан ёзсам ғазал,
Шул ғазал сатрига сингган бебаҳо дурдонаман.